വേലി പൊളിക്കുന്ന പശു

വേലി പൊളിക്കുന്ന  പശു 

ഒരു പച്ചിലയേയും

വെറുതെ വിടില്ല 

എല്ലാം രുചിച്ച്

എന്നിട്ടും വിശന്ന്

അതങ്ങനെ പെരുവഴിയിൽ 

നിന്ന് കരയും

അതിനെ  നിങ്ങള്

വീട്ടിലേക്ക്  കൂട്ടരുത് 

പാല് തരില്ലെന്നല്ല 

പല്ല് തൊഴിച്ചു 

കളയുകയും 

ചെയ്യും

അകിട് കറന്നാൽ 

ചോരയിറ്റും

അകത്തുമുണ്ടാവും

പുറത്തേതിനേക്കാൾ 

പഴുത്ത വൃണങ്ങൾ 

നിങ്ങള്  ഇളം പുല്ല്  കൊടുത്താലും  

അത്  കൊടിത്തൂവയുടെ 

രുചിയറിയാൻ  പോവും 

മൂക്ക് കയറിട്ട്  കുടുക്കുന്ന 

ആഗ്രഹങ്ങളൊക്കെ ഒരൊറ്റക്കുതിപ്പിനു 

പുറത്ത് ചാടും  

കുതിപ്പുകളും  കിതപ്പുകളും 

കൊണ്ട് അതെന്നും 

പരിധിക്ക്  പുറത്തായിരിക്കും 

നിങ്ങളുടെ  രാത്രികളിൽ 

അലോസരത്തിന്റെ സൈറണുകള്

നീളെ  മുഴങ്ങും 

അതുകൊണ്ട്  വേലി പൊളിക്കുന്ന 

പശുവിനെ വെറുതെ വിടുക

അതീ വഴിയിലിങ്ങനെ 

നില്ക്കട്ടെ 

അതിന്റെ കഴുത്തിലൊരു കയറുണ്ടെന്നു  

നിങ്ങള്ക്ക് വെറുതെ തോന്നുതാണ് 

എല്ലാം രുചിച്ച്

എന്നിട്ടും വിശന്ന്

അതങ്ങനെ പെരുവഴിയിൽ 

നിന്ന് കരയട്ടെ